အစပ်ကြိုက်သူတွေ ခံတွင်းမြိန်စေမယ့် ကြက်သွန်ဖြူပုစွန်အစပ်ကြော်

ရာသီဥတုပူလို့ ဟင်းတွေကို အချိန်ကြာကြီးမချက်ချင်တဲ့ အိမ်ရှင်မတွေအတွက် အချိန်ခဏလေးနဲ့ ပြင်ဆင်ချက် ပြုတ်နိုင်တဲ့ ပုစွန်အစပ်ကြော်နည်းလေး ဝေမျှပေးချင်ပါတယ်။ ဒီဟင်းလျာကတော့ ဘယ်သူမဆို ချက်လေ့ရှိ တယ်ဆိုပေမယ့် အခုပြောပြမယ့်နည်းက ချက်နေကျပုံစံကနေ အနည်းငယ်ကွဲထွက်ပြီး အနံ့မွှေးမွှေးလေးနဲ့ ပုစွန်ထုပ်အရသာဆိမ့်ဆိမ့်လေး ခံစားရမှာပါ။

အစပ်ကြိုက်သူတွေခံတွင်းမြိန်စေမယ့် ပုစွန်အစပ်ကြော်ဖို့ —

ပုစွန်ထုပ်

သံလွင်ဆီ

ကြက်သွန်ဖြူ

ငရုတ်သီးခြောက်

ဆား

ငရုတ်ကောင်း တို့ပဲ လိုပါတယ်။

အရင်ဆုံး ဝယ်လာတဲ့ ပုစွန်ကို သေချာသန့်စင်ပြီး အမြီးနဲ့ခေါင်းချန်ကာ အခွံနွှာထားပါ။ အခွံနွှာတာမကြိုက်တဲ့သူ ဆိုရင်လည်း အခွံအတိုင်းကြော်စားလည်းရပါတယ်။ ပုစွန်တွေကို အရသာမှုန့် အနည်းငယ်နဲ့နယ်ထားပါ။

ဒီဟင်းလျာမှာ ကြက်သွန်ဖြူက အဓိကမို့ ကြက်သွန်ဖြူ ၁၀ မွှာ၊ ၁၅ မွှာလောက်ကို နုပ်နုပ်စဉ်းထားပါ။

ငရုတ်သီးခြောက်တွေကို ငရုတ်ဆုံထဲထည့်ပြီး ထောင်းပါ။

အဆင်သင့်ဖြစ်ပြီဆိုရင် စကြော်လို့ရပါပြီ။ ကြော်မယ့်ဒယ်အိုးထဲကို သံလွင်ဆီထည့်ပါ။ ဆီပူလာပြီဆိုရင် နုပ်နုပ်စဉ်းထားတဲ့ ကြက်သွန်ဖြူကို ထည့်ကြော်ပါ။ အနံ့မွှေးလာပြီး ကြက်သွန်ဖြူတွေ ရွှေအိုရောင်သမ်းသွားပြီဆိုရင် အရသာနယ်ထားတဲ့ ပုစွန်ထုပ်ကို ထည့်ကြော်လိုက်ပါ။

ပုစွန်တွေ လိမ္မော်ရောင်ပြောင်းသွားလို့ အသားကျက်သွားပြီဆိုရင် ငရုတ်သီးအကြမ်းဖက်၊ ဆားနဲ့ ငရုတ်ကောင်း အနည်းငယ်ထည့်လိုက်ပါ။ အရသာမြည်းကြည့်လို့ အနေတော်ပဲဆိုရင် အနံ့မွှေးမွှေးလေးနဲ့ ဆိမ့်ဆိမ့်လေးစား ကောင်းမယ့် ကြက်သွန်ဖြူပုစွန်အစပ်ကြော်တခွက်ရပါပြီ။

ဧရာဝတီ

Media Links Team

Leave a Reply

Your email address will not be published. Required fields are marked *

Post comment

This site uses Akismet to reduce spam. Learn how your comment data is processed.